Новости
Октябрьскай нэһилиэк Оонньууларга бэлэмнэнэр
Октябрьскай нэһилиэк эһиил Ньурбаҕа буолаары турар 9 Спортивнай оонньуулар тэрээһиннэрэ ыытыллар биир сүрүн улахан нэһилиэгэ буолар. Нэһилиэк баһылыга С.А.Корякинтан аҕыйах боппуруостарга эппиэттииригэр көрдөстүм.
— Семен Александрович, үтүө күнүнэн! Эһиги нэһилиэккитигэр ханнык оонньуулар буолуохтаахтарый, онно туох үлэлэр бара туралларый?
— Үтүө күнүнэн! Октябрьскай нэһилиэк бокса биһигэ буоларынан, Олимпиадаҕа тиийэ ситиһиилээх спортсмен баарынан, единоборство зала тутулла турарынан биһиги нэһилиэкпитигэр бу көрүҥ буолар диэн кэтэһэ сылдьыбыппыт. Ол эрэн бүтэһик уларыйыылар түмүктэринэн волейбол буолара аҕыйах хонуктааҕыта билиннэ. Массабай, дьон сөбүлүүр көрүҥэ.
Ону тэҥэ Антоновка сиригэр, Кыталыктаах кырдалыгар зачет таһынан ыытыллар ат сүүрдүүтэ уонна оҕунан ытыы күрэхтэрэ ыытыллыахтаахтар. Ипподрому саҥардыы үлэтин чэрчитинэн ППМИ-нан эбии үп сүүйбүппүт. Түгэнинэн туһанан, мантан сиэттэрэн сыспай сиэллээҕи өрө туппут биир дойдулаахпыт Михаил Тимофеев аатын үйэтиигэ эмиэ үлэлэһэбит.
— Билиҥҥи туругунан нэһилиэккитигэр төһө бэлэмнэнии үлэтэ бара турарый?
— Оонньууларга бэлэмнэнии үлэтин кыралаан 2023 сылтан саҕалаабыппыт. Ол сыл бастакы улахан хардыыбыт ППМИ-нан кылабыыһабытын күрүөлээһин буолбута. Бүгүҥҥү күҥҥэ тупсарыы үлэтэ, нэһилиэк дизайн-кодун оҥорторуу, от-мас, сибэкки олордуута, суол аспааллааһына, ааҕан ситиллибэт субуотунньуктар, сувенирдары оҥоруу, волонтердары кытта үлэ, онтон да атын бааллар.
Эһиилги улахан тэрээһиҥҥэ анаан дьаһалта иһинэн биэс хамыыһыйа тэриллэн үлэлиир. Тэрилтэлэрбит, түөлбэлэрбит, общественниктарбыт, көхтөөх олохтоохторбут туохха барытыгар төһүү күүспүт. Уонна биир сүрүн соругунан, уһун кэмнээх үлэнэн Оонньуулар тула дьону-сэргэни түмүү, биир санааҕа киллэрии диэн ааҕабыт.
— Туох кыһалҕалар баалларый?
— Ханнык да үлэ кыһалҕата суох ааспата буолуо, буолаары буолан билиҥҥи ыарахан кэмҥэ. Төһө кыалларынан тутатына быһаарарга дьулуһабыт. Саҥа спорт объегын тутуутугар болҕомто уурабыт, бэдэрээтчиккэ туох кыһалҕа үөскээбитинэн көмөлөһө, быһаара сатыыбыт. Федеральнай үбүнэн тутуллар, онон эппиэтинэс улахан.
Биир кыһалҕа ипподром матырыйаала кэлиитигэр баар, уматык чааһа итинэн эмиэ таарыйар. Нэһилиэк саҥа стелата туруохтаах, кэккэ биричиинэнэн үлэ саҕаланара кыратык сыҕарыйда. Кылгастык бэлиэтээтэххэ итинник.
— Ыалдьыттары уонна спортсменнары ханна аһатаҕытый, хоннороҕутуй?
— Сэрэбиэйдээһин түмүгүнэн Октябрьскай нэһилиэк дьоно-сэргэтэ Нам улууһун көрсөбүт. Үөрбүппүт. Улахан судаарыстыбаннай, политическай деятеллэр дойдулара ыкса сибээс олохтуурбут эмиэ биир суолталаах.
Делегациялар түһүүлэрин, аһатыыларын үөрэх салалтата дьаһайар. Реестрга киирбит биһиэхэ икки объект баар, оскуола уонна «Биһик» уһуйаан. Онон күрэхтэр да буолалларынан, түһэр, аһатар объектар да баалларынан Оонньуулар устата Антоновкабыт ньиргийэн олоруо.
— Туох интэриэһинэй, туспа дьикти толкуйдар баалларый, киэргэтиилэр эҥин өттүгэр?
— Оонньуулар туох баар тэрийээччилэрэ, кыттааччылара, ыалдьыттара биһиги нэһилиэкпитинэн ааһыахтара, кииҥҥэ чугаспытынан, олимпиец дойдута буоларбытынан кэлии-барыы элбэх буолара күүтүллэр. Былааннаабыт үлэбитинэн баран иһэбит.
Уратыны, дьиктини хас биирдии ыалдьыт бэйэтигэр бэлиэтээн көрүө, сыаналыа. Биһиэхэ дьикти атыттарга интэриэһинэйэ суох буолуон сөп уонна биһиги санаабытыгар боростуой атын дьон хараҕар, санаатыгар уратытык көстүөн сөп.
Антоновкалар биир уратыбыт, киэн туттуубут – элбэх ахсааннаах спортсменнарбыт улуус сүүмэрдэммит хамаандатыгар бааллара.
— Махтал, Семен Александрович, сиһилии эппиэттэри биэрбиккэр. Нэһилиэккитигэр баҕарыам этэ ити курдук күүскэ бэлэмнэнэн ыалдьыттарбытын үрдүк таһымҥа көрсөргүтүгэр!
Интервью ылла Толбон Сээркээн
"Ньурба" хаһыат сайтыттан